S

Saxaafadda Gobolka sool iyo Wasiiradda Somaliland ee  ku sugan magaaladda Laascaanood ayaa waxa ay saaka yeesheen Kulan ka dib markii maalmihii la soo dhaafay la xidhay wariyayaal ku hawlan shaqadooda saxaafadeed , Kulankan oo ahaa mid qaatay muddo saacado ah ayaa lagu  gorfeeyey arimo badan.

 

 Wasiirka Arimaha gudaha C/laahi Ismaaciil Cali (cabdilaahi Ciro)  iyo Wasiirka Cadaaladda Axmed xasan Cali Casoowe, iyada oo dhinac Saxaafaddana ay dhamaantood wada joogay, ugu horayn waxaa kulankas furay wasiirka Arimaha gudaha Cabdilaahi Cirro oo waano iyo wax sheegba u soo jeediyey Saxaafadda waxana kale oo uu ka hadlay xadhiga joogtada ee wariyayaasha gobalka loo gaysto sidii looga bixi lahaa.

Sidoo kale wasiirka Cadaaladda ayaa xusay in wariyaayasha jooga Laascaanood aysan wasaaradda Warfaafinta ka haysan Aqoonsi isla markaasna ay waajib tahay in wariyayaasha la siiyo kaadhadhka Aqoonsiga ah, waxana isla markaasna uu xusay in loo  bahan yahay in suxufiyiinta gobolka sool ay helaan Tababaro. 

 Dhanka Saxaafadda Gobalka Sool ayaa ugu horayn waxaa u hadlay Axmed Cali Faarax oo ah wariyaha Tv-ga ETN ee gobolka sool waxana uu xusay in wariyaashu ay inta badan la kulmaan cabudhin joogta ah oo aan xaq loogu la hayn,

Faysal Jaamac Aadan ayaa wasiiradan ka codsaday in Askarta Policeka ah uusan Suxufiyiinta isla markiiba aysan soo qaban ee uu soo maro wada sharciga ah ee Maxkamdu jidaysay.

Cabdisamad Kayse Maxamuud ayaa ka sheekeeyey baahiyaha joogtada ah ee ay qaban suxufiyiinta Gobalka Sool waxana uu sheegay in wariyayaasha ka hawl gala gobaladda Somaliland ee ay helaan tababaro, siminaaro iyo gunooyin kale balse kuwan Laascaanood ka hawlgala ay ka ooman yihiin

Ugu danbayntii shirkan suxufiyiinta iyo wasiiradu waxa uu ku soo ibo belay jawi wanaagsan iyada oo Wasiirka arimaha gudaha uu ka codsaday in wariyaashu ay soo gudbiyaan waxa ay ka cabanaayan isla markaasna loo balamay kulan kale.

 

 

 

 

 

 

 

 

holhol.net

holholnews@hotmail.com